Mütterche – Liedtext aus dem Album „Kitsch oder Stuss“ – CABB

Strophe 1
Du wors Enerjie, kleine Wibbelstätz
Su schnell kunnt mer manchmol kaum luure
Hats immer ne fröhliche Klang im Hätz
Un dääts selten lang jet beduure
No vürre jesinn un et Bess drus jemaaht
Immer neujierig, middenmangs dobei
Häs am leevste e löstijes Schnüssje jeschwaat
Un alle Jram wor dann janz flöck vürbei

Rerain
Uns Mamm – wat hatt mer mit Dir e Jlöck!
Dat weed uns die Tröncher verjaare
Mer dunn suwiesu Dinge zärtliche Blick
für alle Zigg deef in uns draare

Strophe 2

Häs nur drop jeaach, dat et uns joot jonn däät
Hats immer e Ührche, Du kunnts waade
Saahts dat jede Minsch in sich jet Joodes drääht
Selfs de biestigste Klaafmüül un Kraade
Unse Bap un mer Drei han Dich of Kraf jekoss
Do dääht im Jebälk et ens kraache
Wor nit alles friedlich, wor janz schön jet loss
Doch mit Dir kunnt mer immer widder laache

Refrain
Uns Mamm – wat hatt mer mit Dir e Jlöck…
Vun Dir dääte mer liere, loss immer et Sünnche erin
Su arglos wie Dich han mer süns keine Minsch mieh jesinn

Strophe 3
Jetz biste flöck üvver die Brück
Häs Dich janz heimlich verdrück – mer woote baahl verrück
Doch eins hanmer die Daach alt janz off jesaaht:
Dat…. Dat häste jot jemaht

Refrain
Uns Mamm – wat hatt mer mit Dir e Jlöck!
Dat weed uns die Tröncher verjaare
Mer dunn suwiesu Dinge zärtliche Blick
für alle Zigg deef in uns draare

Vun Dir dääte mer liere, loss immer et Sünnche erin
Su arglos wie Dich han mer süns keine Minsch mieh jesinn
Du wees für uns allzigg janz jroß
Un uns wunderbar liebevoll Mütterche sin
uns fröhliches wunderbar liebevoll Mütterche sin

Mütterche – Liedtext aus dem Album „Kitsch oder Stuss“

Teilen mit: